Tlam mbruê, ti Anôk bruă Khua lăn čar, Khua gĭt gai Nguyễn Phú Trọng  gĭt gai leh knăm drông Khua gĭt gai China Tập Cận Bình hlue si klei bhiăn yuôm bhăn hĭn kơ khua păn akŏ ala čar. Leh anăn, dua khua gĭt gai bi trông, ksiêm dlăng hdră mđĭ kyar klei bi hgŭm dua Đảng, dua ala čar, bi tŭ ư lač kơ klei bi hgŭm mơ̆ng dưm jing ƀĭng găp, ayŏng adei kyua Khua gĭt gai Hồ Chí Minh, Khua gĭt gai Mao Trạch Đông hŏng phung khau gĭt gai nao êlâo mkŏ mjing leh anăn ksŭl mbŭ jing ngăn drăp yuôm bhăn dua ala čar, brei lŏ čuê leh anăn mđĭ lar.

Dua tĭng tŭ ư mkŏ mjing Êpul êya bi kah mbha êdei anăp Việt Nam - China jing yuôm bhăn, gĭr ktưn kyua klei jăk mơak mơ̆ng mnuih ƀuôn sang dua ala čar, kyua klei êđăp ênang leh anăn hnơ̆ng đĭ kyar mơ̆ng anak mnuih, djŏ guôp hŏng Hdră bhiăn phŭn êpul hgŭm lu ala čar leh anăn hdră bhiăn lu ala čar, hlăm klei bi mpŭ, bi hgŭm mtăp mđơr, hnơ̆ng mâo klei tŭ dưn, mpŭ kơ klei êngiê leh anăn kluôm ênŭm ala čar, gĭr msir mgaih klei amâo thâo bi djŏ hŏng hdră êđăp ênang. Leh klei bi trông gưl dlông, dua Khua gĭt gai hrăm mbĭt ksiêm dlăng leh anăn hưn mthâo kơ 36 hră kuôl kă bi hgŭm hlăm lu bruă dưi bi siñê.

Khua gĭt gai Nguyễn Phú Trọng jak iêô leh anăn mbĭt hŏng Khua gĭt gai China Tập Cận Bình mnăm êa čê. Dua Khua gĭt gai hmư̆ klei hưn mthâi kơ mnơ̆ng dhơ̆ng mơ̆ng čê hing ang ti Việt Nam leh anăn klei bhiăn mnăm êa čê mdê hjăn mnuih Yuăn, mbĭt anăn bi êdah klei msĕ kơ dhar kreh dua djuê ana. Tlam mmăt, Khua gĭt gai Nguyễn Phú Trọng hŏng mô̆ ñu, Khua lăn čar Võ Văn Thưởng hŏng mô̆ ñu mkŏ mjing klei huă  čhưn kdrưh kơăm drông Khua gĭt gai China Tập Cận Bình leh anăn mô̆ gơ̆.