Blŭ hrăm ti knăm anăn, Khua gĭt gai Tô Lâm lač, hrue 2/9/1945, ti Wăl tač Ba Đình hƀuê ênuk, Khua gĭt gai Hồ Chí Minh dlăng leh hră hưn mdah lăn čar mâo klei êngiê, mơĭt truh kơ tar rŏng lăn thâo hrue mkŏ mjing knŭk kna mơ̆ng lăn čar Việt Nam Dân chủ cộng hòa, ară anei jing lăn čar yang ƀuôn ngă phŭn êngiê Việt Nam.

Dăl 79 thŭn êgao, ti gŭ klei kiă kriê mơ̆ng Đảng, tui tiŏ hdră êlan ñu iêo mthưr, kwang nanao klei ƀuăn kơ klei hnŭk êngiê, kơ klei mĭn kjăp mră “amâo mâo ôh klei yuôm bhăn hĭn kơ klei hnŭk êngiê, êđăp ênang”, jih jang djăp djuê ana Việt Nam mâo leh klei bi mguôp sa ai tiê, mâo klei bi mguôp hŏng tar rŏng lăn hlăm klei klă mngač, atăt cách mạng Việt Nam leh mâo mă klei dưi anei truh klei dưi adih, mâo suă wĭt klei hnŭk êngiê kơ djuê ana, bi hluh lir lăn čar, kjăp knhuang čhuang nao hlăm hdră êlan yang ƀuôn ngă phŭn êngiê. Khua gĭt gai lač, mâo hĕ dŭm boh tŭ dưn prŏng êdei kơ   79 thŭn mkŏ mjing lăn čar mơ̆ng knŭk kna hnŭk êngiê, bi êdah ai tiê thâo khăp kơ lăn čar, mâo klei bi mguôp prŏng jih jang djuê ana, hŏng klei čŏng kpưn đĭ, kyua klei hnŭk êngiê, jăk mơak mơ̆ng Đảng, mơ̆ng lăn čar lehanăn mnuih ƀuôn sang Việt Nam.