Leh ruĕ klei nao čhưn ala čar Mongol, hrue mbrue (1/10), Khua gĭt gai Tô Lâm mbĭt hŏng êpul khua prŏng Việt Nam kbiă leh mơ̆ng ƀuôn prŏng Ulaanbaatar, đuĕ nao čhưn kơ ala čar Ireland  tui si klei jak iêo mơ̆ng khua mil čhil Ireland. Anei jing klei nao čhưn gưl lăn čar tal êlâo truh hŏng Ireland hŏng bruă klam jing khua lăn čar Việt Nam yap mơ̆ng leh mkŏ mjing klei mjĕ mgiăm, kñăm mđĭ hĭn klei bi đăo knang hlăm bruă kđi čar, lehanăn bi kjăp klei bi mguôp dua nah, mơ̆ng anăn mđĭ hĭn klei bi hgŭm bruă kđi čar, lehanăn klei hgŭm mbĭt Việt Nam-Ireland. 

Klei khua gĭt gai Tô Lâm truh kơ Ireland, bi êdah Việt Nam dlăng yuôm nanao klei bi mguôp hŏng Ireland, lŏ mtrŭn agha kjăp hĭn klei bi hgŭm hlăm djăp mta bruă mơ̆ng dua ala čar hlăm wưng tinăp, boh nik hlăm klei duh mkra mnia mblei, klei duh bi liê, lehanăn bruă kreh knhâo, kdrăp mrâo, mlih mrâo bruă mjuăt bi hriăm, bruă lŏ hma, hŏng mta kñăm mđĭ kyar kjăp, kyua klei êđăp ênang, hgŭm mbĭt lehanăn mđĭ kyar ti alŭ wăl lehanăn hlăm tar rŏng lăn./.