Aguah hruê 26/9, hluê mmông Hà Nội, Khua gĭt gai Tô Lâm lehanăn Mô̆ ñu mbĭt hŏng êpul bi ala gưl dlông ala čar drei  truh leh ti tač êdeh phiơr prŏng Jose Marti ti ƀuôn prŏng phŭn La Habana, mphŭn gưl hiu čhưn truh ti ala čar Cuba hluê asăp jak iêu mơ̆ng Khua bruă Đảng tal 1 Anôk bruă kriê dlăng gưl dlông Đảng Cộng sản Cuba, Khua gĭt gai Cuba Miguel Diaz Canel Bermudez lehanăn Mô̆ ñu.

MKŏ mjing hlăk dua ala čar mđing truh kơ knăm bi hdơr 65 thŭn hruê mkŏ mjing klei bi mjĕ hŏng tač êngao (2/12/1960-2/12/2025), gưl hiu čhưn jing sa klei bi mklă kơ klei hgŭm mguôp jăk siam Việt Nam – Cuba hlăk lehanăn ăt dưi yap jing ngăn dưn yuôm bhăn mâo Đảng, Knŭk kna lehanăn mnuih ƀuôn sang dua ala čar jih ai tiê ksŭl mbŭ, mbĭt anăn bi êdah klei mpŭ mơ̆ng Việt Nam hŏng Cuba lehanăn kơhưm mơ̆ng Cuba hlăm hdră mtrŭn hŏng tač êngao mơ̆ng Việt Nam. Tĭng hlăm gưl hiu čhưn, Khua gĭt gai Tô Lâm nao ti knăm drông klă klơ̆ng; mâo hdră bi trông, bi tuôm hŏng phung khua kiă kriê knơ̆ng mơ̆ng Cuba, ba dưm kwang mnga ti Knưl bi hdơr Khua gĭt gai Hồ Chí Minh lehanăn Pô jhŏng ktang djuê ana Cuba Jose Martí, nao čuă dŭm anôk bruă duh mkra, hlăm anăn mâo hdră bi hgŭm lehanăn duh bi liê mơ̆ng dŭm anôk bruă duh mkra Việt Nam, bi tuôm hŏng ƀĭng găp lehanăn ênuk gưl hđeh dua ala čar./.