Khua gĭt gai Tô Lâm nao čuă, mđĭ ai, mđup brei mnơ̆ng kơ mnuih ƀuôn sang hlăk dôk ti Sang dhar kreh alŭ Phú Thọ 1, să Trường Sinh, kdriêk Sơn Dương, čar Tuyên Quang. Khua gĭt gai Tô Lâm čang hmăng mnuih ƀuôn sang tinei lŏ dơ̆ng bi hơĭt klei hdĭp. Leh kơnăn, Khua gĭt gai Tô Lâm nao ksiêm dlăng leh hdră msir mghaih klei êa lip lêč, bi kjăp guê gang êa, mnuôr mbông êa, nao čuă lehanăn mđĭ ai êpul nao hgŭm hlăm hdră bi kjăp guê gang êa ti krông Lô hlăm alŭ wăl kdriêk Sơn Dương.

Gĭt gai knăm mă bruă hŏng phung khua kiă kriê čar Tuyên Quang kơ hdră msiê mghaih klei êa lip lêč ti alŭ wăl, Khua gĭt gai Tô Lâm mtă brei ksiêm dlăng, msir mghaih mtam dŭm klei truh huĭ tăm mâo ti dŭm guê gang êa, mnuôr mbông êa, kban; mâo hdră kčah mbĕ mnuih ƀuôn sang, pŏk ngă pral hdră đru dŏng, mkăp mnơ̆ng ƀơ̆ng huă. Mmăt hruê 12/9, ti ƀuôn prŏng Việt Trì, Khua gĭt gai Tô Lâm mă leh bruă hŏng phung khua čar Phú Thọ lehanăn mđing hmư̆ dŭm klei ba mdah, klei akâo čiăng mơ̆ng čar kñăm msir mghaih klei truh mơ̆ng angĭn êbŭ ngă./.