Hluê hŏng bruă mđing hmư̆ dŭm klei blŭ, klei đru mguôp ti anôk bi kƀĭn trông lehanăn bi tuôm hŏng lu êpul group mrô sa, Khua gĭt gai brei thâo, dưi ƀuh leh klei hur har, jih ai tiê kơ bruă mơ̆ng êpul êya anôk bruă duh mkra Mi čiăng mtrŭt mđĭ hdră pŏk mlar bruă duh bi liê hŏng Việt Nam hlăm wưng ti anăp, mbĭt anăn čang hmăng anôk bruă duh mkra Mi lŏ dơ̆ng gĭr ktưn hĭn čiăng jing anôk bruă duh mkra mrô sa ti Việt Nam, mđĭ lar klei găl, ba yua jih klei mâo hluê hdră bi mjĕ mtăp mđơr, bi knar, mpŭ hdơ̆ng găp lehanăn dua nah mâo klei tŭ dưn čiăng năng hŏng Klei bi mjĕ Ƀĭng hgŭm phŭn kluôm dhuôm mơ̆ng dua ala čar.

Čiăng dưi mâo mta kñăm anăn, Khua gĭt gai čang hmăng kơ dŭm Phŭn, dhar bruă, anôk bruă djŏ tuôm dua ala čar lŏ dơ̆ng bi sĭt dŭm hdră êlan mơ̆ng Klei bi mjĕ ƀĭng hgŭm phŭn, kluôm dua nah; pral đru msir mghaih dŭm klei dleh dlan, gun kpăk mơ̆ng phung duh bi liê. Khua gĭt gai ăt čang hmăng Knŭk kna Mi srăng mtrŭt mđĭ anôk bruă duh mkra Mi mđĭ hdră duh bi liê hlăm Việt Nam, mjing klei găl, đru kơ phung duh bi liê Việt Nam pŏk mlar hdră duh mkra mnia mblei tŭ dưn./.