VOV4.Êđê - Tŭ ư asăp jak iêu mơ̆ng Knŭk kna Dhŭng Korea, Khua hlăm Anôk bruă Đảng Võ Văn Thưởng djă akŏ Êpul bi ala gưl dlông mơ̆ng Đảng drei srăng nao čhưn ti Dhŭng Korea truh kơ jih hruê 4/8/2022. Mta kñăm gưl nao čhưn kñăm pŏk êlan kơ hdră bruă hŏng tač êngao êngiê, ngă phŭn mil pô, êđăp ênang, bi mjĕ mjuk lehanăn đĭ kyar, bi lu jơr hdră bruă hŏng tač êngao jing ƀĭng găp, jing ƀĭng hgŭm đăo knang, mâo klei đua klam hŏng êpul êya tar rŏng lăn, hlăm anăn bi myuôm bruă mtrŭt mđĭ lehanăn bi êlam klei bi mjĕ dua nah, boh nik Dhŭng Korea jing ƀĭng hgŭm yuôm mơ̆ng Việt Nam. Tĭng, hlăm gưl čhưn anei, Võ Văn Thưởng srăng nao kkuh Khua knŭk kna Dhŭng Korea, bi tuôm hŏng Khua kiă kriê Đảng Ai ktang ala čar, bi tuôm khua bi ala Đảng Ngă phŭn mil pô hrăm mbĭt, bi tuôm Khua êpul bi mjĕ mjuk Dhŭng Korea - Việt Nam, bi tuôm hŏng Êpul mnuih Dhŭng Korea mâo k’hưm, bi tuôm hŏng Khua kiă kriê êpul mnuih Dhŭng Korea khăp čiăng kơ Việt Nam, nao čhưn Anôk bi ala Việt Nam ti Dhŭng Korea./.

H’Nêč pô mblang