VOV4.Êđê - Hruê mbruê Khua hlăm êpul bruă Võ Văn Thưởng blŭ hrăm êlan online hŏng Roberto Morales Ojeda, khua hlăm êpul bruă Đảng Cuba. Võ Văn Thưởng hâo hưn leh kơ dŭm boh tŭ dưi mâo hlăm bruă gang mkhư̆ klei ruă tưp, mđĭ kyar bruă duh mkra mơ̆ng Việt Nam, klei gĭr ktưn hyuă kjăp leh anăn hluê ngă hdră mtrŭn klei kƀĭn kluôm bruă Đảng tal 13. Roberto Morales Ojeda mâo klei hơêč hmưi kơ dŭm boh tŭ dưn Việt Nam dưi mâo hlăm hruê mmông êgao, bi êdah klei đăo knang ti gŭ klei gĭt gai mơ̆ng Đảng, mnuih ƀuôn sang Việt Nam srăng ngă tŭ jing dŭm mta kñăm mơ̆ng klei kƀĭn kluôm bruă Đảng tal 13 bi êdah leh. Roberto Morales Ojeda ăt hâo hưn kơ dŭm hdră êlan hlăm djăp mta bruă leh sa thŭn hluê ngă hdră mtrŭn klei kƀĭn kluôm bruă Đảng 13 mơ̆ng Cuba, hdră tă, hdră êlan hŏng tač êngao mơ̆ng Cuba leh anăn dŭm bruă tal êlâo hĭn kơ klei đĭ kyar bruă duh mkra ala ƀuôn hlăm hruê mmông kơ anăp.

Y-Ƀel pô mblang