VOV4.Êđê- Ƀri wưng tết knhuah gru Chôl Chnăm Thmây thŭn 2022, bi ala kơ Dhar bruă mặt trận čar kwar gưl dlông Việt Nam, khua bruă Đảng gưl dlông, khua kiă kriê Dhar bruă mặt trận čar kwar Việt Nam Đỗ Văn Chiến mâo leh hră hơêč hmưi kơ phung đăo yơ̆ng leh anăn mnuih ƀuôn sang djuê ana Khmer. Hlăm hră hơêč hmưi anăn, Đỗ Văn Chiến mâo klei êmuh kña, klei hơêč hmưi thŭn mrâo suaih pral, mâo klei myun, klei jăk mơak truh kơ jih jang mnuih ƀuôn sang djuê ana Khmer hlăm kluôm ala. Drông tết Chôl Chnăm Thmây thŭn 2022, Đỗ Văn Chiến hmăng hmưi phung đăo yơng leh anăn mnuih ƀuôn sang djuê ana Khmer lŏ dơ̆ng bi lar knhuah gru jăk siam djuê ana, bi mguôp sa ai hŏng Đảng, hŏng jih jang mnuih ƀuôn sang, lĭng kahan mtrŭt mđĭ klei bi lông, bi ktưn khăp kơ ala čar, gĭr ktưn ngă tŭ jing dŭm mta kñăm mđĭ kyar bruă duh mkra ala ƀuôn mâo leh gưl dlông, alŭ wăl bi klă, kñăm hluê ngă jăk bruă gang mkhư̆ klei ruă tưp, rơ̆ng klei suaih pral, klei hdĭp grăp čô mnuih ƀuôn sang, sa ai, hrăm mbĭt hluê ngă mâo boh tŭ dưn dŭm hdră bruă djuê ana mơ̆ng Đảng leh anăn knŭk kna, boh nik jing hdră mkăp ala čar kñăm mđĭ kyar bruă duh mkra, ala ƀuôn krĭng mnuih djuê ƀiă leh anăn krĭng čư̆ čhiăng wưng thŭn 2021 -2030. Mbĭt hŏng anăn čiăng gĭr ktưn bi lar knhuah dhar kreh jăk siam djuê ana Khmer, bi lu jơr hlăm dhar kreh dŭm djuê ana Việt Nam.

        Pô mblang: Y-Ƀel Êban