VOV4.Êđê- Hŏng ênhă lăn lŏ hma êbeh 500 êbâo ha leh anăn êpul hlô mnơ̆ng đĭ truh 700 êbâo drei, hŏng dŭm klei găl kơ yan adiê, lăn ala, Gia Lai mâo lu klei găl čiăng mđĭ kyar bruă lŏ hma. Bruă lŏ hma ăt jing bruă mâo čar Gia Lai mjing klei găl čiăng iêô jak duh bi liê. Hlăm klei bi kƀĭn mtrŭt mjhar duh bi liê thŭn 2022 čar Gia Lai mrâo mkŏ mjing hlăm hruê 21/5 mrâo êgao, Võ Ngọc Thành - Khua Knơ̆ng bruă sang čư̆ êa čar Gia Lai bi mklă” čar mkŏ mjing leh hdră iêô jak duh bi liê hlăm bruă lŏ hma.

-Hlăm wưng leh êgao, ya mta klei tŭ dưn čar mâo leh čiăng iêo jak klei duh bi liê hlăm bruă lŏ hma?

Võ Ngọc Thành: Hŏng klei găl prŏng kơ lăn ala, ya adiê, dŭm thŭn leh êgao, mâo dŭm hdră êlan wir kơ bruă lŏ hma ênuk mrâo, mđing kơ bruă mkra mjing boh mnga mơ̆ng bruă lŏ hma, snăn čar Gialai mâo leh klei bi mlih prŏng iêo jak phung duh bi liê, lehanăn dŭm êpul grŭp prŏng hriê bi ksiêm duah, čiăng mâo klei găl kơ bruă duh bi liê. Mâo leh dŭm êpul grŭp prŏng, phung duh mkra prŏng msĕ si Doveco, Trường Hải, Hoàng Anh Gialai bi duh kơ bruă lŏ hma. Mâo dŭm phung duh mkra rŭ mjing lehanăn ngă leh dŭm hdră êlan kơ bruă lŏ hma hmei ƀuh mâo klei tŭ dưn, mjing leh klei iêo jak prŏng hŏng phung duh mkra mkăn; amâodah mjing djăp klei bi mlih, dăp wĭt mnơ̆ng pla mjing hlăm čar, lehanăn mjing krĭng truăn kơ dŭm mta mnơ̆ng pla mjing sa anôk. Hlăm anăn mâo klei bi mguôp hlăm bruă pla mjing, mkra mjing boh mnga, čhĭ mnia, ngă leh kơ bruă duh mkra pla mjing ti Gialai phŭn tal êlâo mâo leh klei hđuh jăk. Hnơ̆ng hrui wĭt kơ mnuih ngă bruă, phung ƀuôn sang đĭ nanao, ƀô̆ ală krĭng ƀuôn sang mâo klei bi mlih ƀrư̆ ƀrư̆, đru hlăm bruă mkŏ mkra krĭng ƀuôn sang mrâo ti dŭm alŭ wăl hlăm čar.

Võ Ngọc Thành-  Khua Knŏng bruă sang čư̆ êa čar Gia Lai

-Wưng leh êgao Bruă Đảng čar lehanăn knơ̆ng bruă sang čư̆ êa čar Gialai si lŏ mjing klei găl čiăng iêo jak phung duh mkra prŏng, phung duh mkra mơ̆ng ala tač êngao hriê duh bi liê hlăm bruă lŏ?

Võ Ngọc Thành: Hdră mtrŭn mơ̆ng Bruă Đảng čar tal 16 mâo leh 4 hdră ngă bruă lehanăn lŏ thiăm đa đa hdră anăn jing 5 klei ngă bruă. Hmei mĭn anei jing hdră êlan jăk pioh mtrŭt jih jang bruă lŏ hma mâo klei đĭ kyar, lehanăn lŏ mjing klei hriăm jăk pioh kơ knơ̆ng bruă sang čư̆ êa thâo lŏ mkŏ mjing hdră mă bruă kñăm hluê ngă hdră mtrŭn anăn. Hdră mtrŭn tal sa jing mkŏ mjing mnuih ngă bruă bi kjăp, mơ̆ng jih jang bruă kđi čar ti djăp gưl kñăm dưi păn jih bruă mrâo. Hdră mtrŭn tal dua jing, mkŏ mjing kjăp jih jang bruă nah gŭ pioh kơ bruă mđĭ kyar. Hdră mtrŭn tal 3, iêo jak jih jang ai ktang klei duh bi liê kơ bruă lŏ hma hŏng kdrăp mrâo mrang, mâo kdrăp mkra mjing, yua pui kmlă doh, lehanăn ngă bruă hiu čhưn ênguê truh kơ thŭn 2030 (hdră mtrŭn 07-NQ/TU hrue 20/2/2022). Hdră mtrŭn tal 4 jing, mđĭ kyar doh kơ bruă kiă kriê, lehanăn mđĭ kyar dliê, mđĭ hnơ̆ng luôm lăn dliê, lehanăn mjing klei găl kơ phung ƀuôn sang duh ƀơ̆ng hlăm gŭ êyui kmrơ̆ng. Lehanăn hdră mtrŭn tal 5 mrâo bi lar kơ klei bi mlih mrô. Ară anei čar hlăk mâo sa hdră ngă bruă, mơ̆ng anăn srăng mkŏ mjing sa hdră êlan djŏ guôp hŏng klei duh bi liê, mđĭ kyar, lehanăn jih jang hdră čiăng iêo jak klei duh bi liê, kñăm si wĕ srăng ngă dưi mjing djăp klei găl hĭn kơ phung duh bi liê truh lehanăn hlŏng dôk čiăng duh bi liê hlăm čar.

Kphê jing sa hlăm dŭm mta mnơ̆ng dhơ̆ng lŏ hma phŭn ti čar Gia Lai

-Čiăng kơ bruă lŏ hma ti Lăn Dap Kngư, hlăm anăn mâo čar Gialai đĭ kyar bi năng hŏng klei găl, klei mâo leh jăk ti alŭ wăl, snăn ya mta klei čar čiăng akâo hŏng Gưl dlông?

Võ Ngọc Thành:   Kâo bi mĭn dưn yua pla mjing djăp mta mnơ̆ng mơ̆ng krĭng Yŭ kwar Dhŭng truh hŏng lăn Dap Kngư srăng jing bruă kơ êdei anăp. Ƀiădah si srăng ngă čiăng kơ drei dưi nao êlan klah, găn akŏ snăn dŭm čar hlăk dôk ksiêm duah hdră êlan mă bruă kơ pô hlăm klei bi mguôp krĭng. Kâo dôk mĭn, Phŭn bruă kđi čar hlăk dôk mprăp kơ klei bi kƀĭn ksiêm wĭt bruă hlue ngă hdră mtrŭn 10 lehanăn 12 mơ̆ng Phŭn bruă kđi čar, lehanăn mkŏ mjing klei bhiăn mă bruă pioh mđĭ kyar ti Lăn Dap Kngư. Kâo čang hmăng kơ hdră mtrŭn anei, srăng mjing klei hđuh kjăp đĭ hriê kơ prŏng ktang hĭn, hmei srăng ksiêm duah, hgŭm jih ai tiê kñăm bi djăp ênŭm hdră mtrŭn anei. Si srăng ngă čiăng kơ Lăn Dap Kngư mâo đĭ kyar kjăp hĭn hlăm wưng kơ anăp, dưi yua jih ai ktang pô ti Lăn Dap Kngư mâo. Tal dua, jing bi mâo klei bhiăn hjăn kơ pô ti krĭng Lăn Dap Kngư. Lehanăn kâo čang hmăng Hdră mtrŭn mơ̆ng Gưl dlông anăp anei hŏng Lăn Dap kngư, msĕ si êlâo anăn mơh mtrŭn leh kơ krĭng Yŭ kwar Dhŭng, srăng ruh mtiah kơ Lăn Dap Kngư dưi đĭ kyar.

  -Lač jăk kơ ih lu! ./.

Pô mblang: Y-Khem Niê