VOV4.Êđê- Yang hruê 29/8 ti anôk bruă Knŭk kna, Khua knŭk kna Phạm Minh Chính drông Alok Sharma, Khua phŭn bruă, Khua COP26 leh anăn Êpul mă bruă mơ̆ng Ala mtao Ăngle hriê čhưn leh anăn mă bruă ti Việt Nam. Hlăm mmông bi tuôm, dua tĭng ksiêm dlăng kơ klei bi mlih yan adiê ƀrư̆ hruê jing jhat hĭn, dleh ktuê dlăng leh anăn dleh đăo knăl hlăm kluôm ala, kyua anăn, brei mâo ai tiê bi hgŭm dlông rŏng lăn leh anăn hdră bi mă bruă kluôm rŏng lăn čiăng mdrơ̆ng hŏng klei bi mlih yan adiê.

Hŏng ai tiê pŏk ngă bi jăk klei ƀuăn rơ̆ng ti COP26, Việt Nam bi mklă leh Hdră bruă ala čar kơ Klei bi mlih yan adiê wưng truh thŭn 2050; Hdră bruă kơ klei bi mlih êa pui êwa čuh doh; Hdră kčah ngă bruă ala čar kơ klei mđĭ kyar mtah wưng 2021-2030... Khua knŭk kna akâo kơ Ala Mtao Ăngle leh anăn dŭm ala čar hgŭm mđĭ kyar hlăm hdră bi trông mkŏ mjing klei bi hgŭm bi mlih êa pui êwa čuh mtăp mđơr čiăng đru kơ Việt Nam kơ kdrăp mrâo, ngăn prăk, mđĭ kyar mnuih mă bruă leh anăn kah mbha klei thâo./.

Pô mblang: H’Zawut Ƀuôn Yă