Blŭ hrăm hlăm klei kƀĭn, Khua Knŭk kna Phạm Minh Chính bi myuôm klei nao hgŭm mơ̆ng dŭm phŭn, dhar bruă, grăp čô hlăm êpul ngă bruă rơ̆ng mâo djăp êa pui ngă leh dŭm hdră êlan bi hơĭt anôk mnia mblei êa săng, êa pui. Lač boh sĭt tar rŏng lăn dleh dưi ksiêm dlăng, Khua Knŭk kna mñă ktang mta kñăm amâo brei kƀah êa pui kơ klei mkra mjing, mnia mblei, blei ba yua mơ̆ng mnuih ƀuôn sang, amâo brei kpăk klei mkăp brei êa pui, bi hơĭt bruă kđi čar, klei êđăp ênang yang ƀuôn, gang mkhư̆ klei mjhua hŏng hdră êlan, ngă klei mtŭk mtŭl, hmăi truh kơ klei êđăp ênang yang ƀuôn.

Khua Knŭk kna Phạm Minh Chính lač, anei jing klei găl mkŏ wĭt bruă mkra mjing mnia mblei, mkăp brei êa săng êa pui, bi găl guôp hŏng boh sĭt mrâo, mñă brei mđĭ hĭn hdră êlan mkăm pioh êa pui, bi lu jơr anôk mnia mblei, anôk mkăp brei, amâo mâo jưh knang hlăm sa anôk mnia mblei.