Knăm drông dưi mkŏ mjing ti Sang bruă kƀĭn ala dôk ti dlông čư̆ Capital ti ƀuôn prŏng phŭn Canberra mơ̆ng Australia, hluê klei bhiăn drông khua kiă kriê Knŭk kna hriê čhưn ti Australia. Hlăm ai êwa h’uh mđao, Khua knŭk kna Anthony Albanese jak leh Khua knŭk kna Phạm Minh Chính đĭ ti dlông knưng mmông anăn 19 asăr knong dưi mnah ti dlông čư̆ Capital. Hla čhiam gru Việt Nam đung jing mnĭt mmông kkuh drông Khua knŭk kna Phạm Minh Chính mbĭt hŏng Mô̆ ñu lehanăn êpul bi ala gưl dlông mơ̆ng Việt Nam.

Leh knăm drông, dua Khua knŭk kna mkŏ mjing leh hdră bi trông, Khua knŭk kna Australia lehanăn Khua knŭk kna Phạm Minh Chính nao leh ti Knăm ba jao hră m’ar hgŭm bruă mbĭt anăn bi tuôm hŏng phung mă bruă klei mrâo mbĭt, hưn mthâo boh tŭ hdră bi trông, hlăm anăn mâo bruă mkŏ mjing Klei bi mjĕ ƀĭng hgŭm phŭn kluôm dhuôm Việt Nam – Australia.

Hlăm dua hruê nao hgŭm hlăm klei kƀĭn trông gưl dlông bi hdơr 50 thŭn klei mjĕ giăm ASEAN – Australia, Khua knŭk kna Phạm Minh Chính mâo leh mmông čiăng bi tuôm hŏng jih jang phung khua gĭt gai gưl dlông dŭm ala čar ASEAN, Australia, New Zealand leh anăn khua kiă kriê ASEAN. Hlăm dŭm klei bi tuôm. Khua knŭk kna Phạm Minh Chính lač jăk kyua klei bi mguôp, klei đru, kah mbha klei hriăm mơ̆ng dŭm ala čar hlăm bruă krŭ wĭt leh anăn mđĭ kyar bruă duh mkra, bi êdah klei hmăng hmưi mtrŭt mđĭ klei bi mguôp hlăm dŭm mta bruă yuôm bhăn mơ̆ng ASEAN leh anăn klei mjĕ giăm Việt Nam hŏng dŭm lăn čar, boh nik jing bruă kđi čar – bruă hŏng tač êngao, bruă duh mkra mnia mblei, bruă lĭng kahan – klei êđăp ênang, mtô mjuăt bi hriăm, klei kreh knhâo mrâo mrang…lŏ dơ̆ng bi mguôp kjăp čiăng mkŏ mjing sa ASEAN bi mguôp, sa ai, mđĭ hĭn klei bi hgŭm hlăm êpul, bi lar bruă klam hlăm bruă mgaih msir dŭm boh klei hlăm klei êđăp ênang, hdră êlan hlăm alŭ wăl .Ƀri wưng anei, Khua knŭk kna Phạm Minh Chính iêo jak leh phung khua gĭt gai gưl dlông dlông dŭm ala čar tiŏ nao pô bi ala nao hgŭm hlăm Klei kƀĭn trông kơ Êdei anăp ASEAN, mĭn tĭng mkŏ mjing ti Hà Nội ti hruê 23/4/2024.