VOV4.Êđê - Khua knŭk kna Phạm Minh Chính mrâo mâo asăp mtrŭn kơ bruă čih mkra hdră êlan pŏk ƀăng êđăp ênang, kreh knhâo, tŭ dưn drông phung tuê hiu čhưn ênguê ala tač êngao. Hluê anăn, Khua knŭk kna mtă kơ Phŭn bruă Dhar kreh, Mjuăt ktang asei mlei lehanăn Hiu čhưn ênguê gĭt gai, bi hgŭm hŏng dŭm Phŭn bruă, mâo: Mdrao mgŭn, Lĭng kahan, Kahan ksiêm, bruă hŏng tač êngao, bruă êlan klông dŭ mdiăng, bruă hâo hưn lehanăn mtô mblang, dŭm phŭn, dhar bruă djŏ tuôm mjêč čih mkra lehanăn pŏk hluê ngă hdră kčah, hdră msir lŏ pŏk ƀăng drông phung tuê hiu čhưn ênguê ala tač êngao hŏng klei êđăp ênang, kreh knhâo, tŭ dưn. Anôk bruă sang čư̆ êa dŭm čar, ƀuôn prŏng hlăm gưl dlông pral bi hgŭm hŏng Phŭn bruă Dhar kreh, Mjuăt ktang asei mlei lehanăn Hiu čhưn ênguê, Phŭn bruă mdrao mgŭn lehanăn dŭm anôk bruă djŏ tuôm čih mkra, ba mdah hdră kčah klă klơ̆ng kñăm mkŏ mjing hluê ngă, mprăp djăp ênŭm kdrăp mnơ̆ng, mnuih mă bruă, pral mâo hdră msir rơ̆ng klei êđăp ênang, gang mkhư̆ klei ruă tưp lehanăn msir mghaih dŭm klei amâo jăk bluh mâo./.

H’Nêč pô mblang