Tlam mbruê 01/10, Khua knŭk kna Phạm Minh Chính gĭt gai klei kƀĭn knŭk kna čiăng bi klă boh sĭt ngă bruă, lŏ dơ̆ng ksiêm dlăng, bi trông kơ dŭm hdră êlan ruh mgaih klei dleh dlan, kpăk gun hlăm bruă bi êran bruă sang čư̆ êa alŭ wăl dua gưl. Blŭ hrăm bi klă hlăm klei kƀĭn, Khua knŭk kna mñă ktang ai tiê srăng ngă bruă ktang phĭt, hrăm mbĭt leh anăn tŭ dưn hĭn, hnưm mgaih msir dŭm klei dleh kpăk ară anei, bruă sang čư̆ êa alŭ wăl 2 gưl čiăng dưi ngă hrăm mbĭt, kluôm dhuôm, bi mâo djăp klei hmăng hmưi mơ̆ng Đảng, knŭk kna leh anăn mnuih ƀuôn sang.

Khua knŭk kna lač, mkŏ mjing klei ngă bruă mrâo srăng jăk hĭn kơ hđăp, bruă mgaih msir hră mơar knŭk kna kơ mnuih ƀuôn sang, knơ̆ng bruă srăng jăk hĭn, boh nik hlăm bruă lăn ala, čuăl mkă, ngăn prăk, rŭ mdơ̆ng, êlan klông, bruă mdrao mgŭn, sang hră mơar…Bi kluôm klei čih pioh leh anăn mkŏ hŏng kdrăp hâo hưn mgaih msir hră mơar knŭk kna mơ̆ng dŭm phŭn, dhar bruă leh anăn alŭ wăl. Hlăm klei kƀĭn, Khua knŭk kna lač klă, ară anei adôk 31 êbâo čô mdei bruă ka dưi tla prăk, mñă brei bi klă phŭn agha, ƀuah mkra anôk bruă mâo leh prăk ƀiădah amâo mâo tla. Khua knŭk kna mñă brei bi leh jih hnơ̆ng bruă tla prăk kơ knuă druh brei bruă êlâo kơ hruê 10/10/2025.