VOV4.Êđê - Khua knŭk kna mrâo bi mklă Hdră mđĭ kyar bruă tuh tia mkra mjing kyâo h’ĭt kjăp, tŭ dưn wưng thŭn 2021-2030. Mta kñăm hdră anei truh ti thŭn 2025, ba čhĭ kyâo kơ ala tač êngao lehanăn dŭm mta mnơ̆ng mơ̆ng kyâo mâo 20 êklai đolar Mi, ba Việt Nam dôk hlăm êpul dŭm ala čar ba akŏ tar rŏng lăn hlăm bruă mkra, ba čhĭ kyâo lehanăn dŭm mta mnơ̆ng mơ̆ng kyâo. Truh thŭn 2030, anôk bruă mkra mjing kyâo srăng jing hdră duh mkra yuôm bhăn; mkŏ mkra, mđĭ kyar anăn knăl mnơ̆ng dhơ̆ng mkra mơ̆ng kyâo Việt Nam hlăm wăl anôk mnia mblei tar rŏng lăn. 100% kyâo, mnơ̆ng dhơ̆ng mkra mơ̆ng kyâo dưi ba čhĭ lehanăn yua hlăm ala čar jing kyâo djŏ hdră bhiăn, mâo gru kđăm bi mklă. Čiăng dưi ngă mta kñăm anei, hlăm 5 thŭn ti anăp, srăng mkŏ mkra 5 krĭng dliê kmrơ̆ng ba yua kdrăp mrâo, jak ieue klei duh bi liê mơ̆ng dŭm anôk bruă, Mđĭ kyar, pŏk mlar dŭm wăl anôk mkra mnơ̆ng mơ̆ng kyâo ti alŭ wăl mâo klei găl mđĭ kyar./.

H’Nêč pô mblang