VOV4.Êđê - Aguah mbrue (13/10), ti ƀuôn prŏng Cần Thơ, Khua knŭk kna Phạm Minh Chính lehanăn phung bi ala bruă kƀĭn ala ƀuôn prŏng Cần Thơ bi tuôm leh hŏng phung ƀuôn sang êlâo kơ klei bi kƀĭn tal 4, Bruă kƀĭn ala gưl 15.

Ti anăn phung ƀuôn sang bi êdah klei đăo knang kơ bruă duh mkra ala ƀuôn lăn čar 9 mlan akŏ thŭn mâo leh lu klei tŭ dưn, lehanăn čang hmăng kơ bruă kƀĭn ala lŏ dơ̆ng mâo hdră jăk hĭn ruh mgaih klei dleh dlan hlăm bruă čhĭ êa drao, kdrăp mnơ̆ng yua mdrao mgŭn, duh bi liê kơ bruă sang êa drao gŭn, hdră êlan klei kơ prăk mlan, kơ bruă lŏ hma... leh hmư̆ klei phung ƀuôn sang akâo, Khua knŭk kna lač kơ dŭm boh tŭ dưn bruă duh mkra hlăm 9 mlan, lehanăn bi êdah klă mngač mơh dŭm klei awăt êdu... Khua knŭk kna mtă kơ dŭm knơ̆ng dhar bruă, djăp alŭ wăl lŏ dơ̆ng ngă jăk hĭn bruă čuăn, hlăm anăn ăt mđing kơ bruă gang mkhư̆ klei ruă tưp Covid 19, bi hơĭt ênoh ênil klei bi mnia mblei, mprăp jih jang kơ klei hdĭp mda, klei drông thŭn mrâo 2023, dưn yua jăk klei găl bi mnia mblei hŏng ala tač êngao ti knhal jih thŭn./.

VOV TâyNguyên/ Pô mblang: Y-Khem Niê