VOV4.Êđê - Tlam mbruê, ti Hà Nội, Khua knŭk kna Cuba Manuel Marrero Cruz bi tuôm leh hŏng Êpul mjĕ mjuk Việt Nam – Cuba lehanăn Êpul hgŭm anôk bruă mjĕ mjuk Việt Nam ƀri gưl hiu čhưn klă klơ̆ng Việt Nam. Hluê anăn, dŭm hdră bi tuôm mơ̆ng dua ala čar dưi mkŏ mjing hŏng klei đăo knang, sŭk suôr, mđĭ klei đua klam hlăm hdră ksŭl mbŭ klei hgŭm mguôp dua djuê ana, ƀuăn lŏ mđĭ hĭn klei hgŭm bruă.

Khua knŭk kna Manuel Marrero Cruz brei thâo, khădah dôk tlă anăp hŏng klei dleh dlan, lông dlăng mơ̆ng asăp kăm khư̆, klei rŭng răng mơ̆ng klei ruă tưp Covid 19 ƀiădah Cuba ăt gĭr krŭ wĭt, mđĭ kyar bruă duh mkra. Blŭ ti knăm anei, Khua dhar bruă hŏng tač êngao mơ̆ng Anôk bruă kƀĭn ala, Khua Êpul hgŭm mjĕ mjuk Việt Nam-Cuba, Khua êpul Nghị sỹ mjĕ mjuk Việt Nam-Cuba Vũ Hải Hà đăo knang, hŏng klei kiă kriê mơ̆ng Đảng Cộng sản Cuba, mnuih ƀuôn sang Cuba ayŏng adei srăng hluê ngă tŭ jing Hdră krŭ wĭt bruă duh mkra; hdră êlan yang ƀuôn ngă phŭn lehanăn mta kñăm mkŏ mkra ala čar hnŭk êngiê, êđăp ênang, ngă phŭn mil pô, đĭ kyar h’ĭt kjăp./.

H’Nêč pô mblang