VOV4.Êđê - Tlam mbrue (2/6), ti anôk bruă knŭk kna, Khua knŭk kna Phạm Minh Chính drông čhưn leh hŏng khua kčĕ bruă lĭng kahan ala čar Lao, trung tướng Khamlieng Outhakaysone, k’iăng khua phŭn bruă lĭng kahan, Khua knơ̆ng kčĕ bruă lĭng kahan Lao hlăk dôk čhưn lehanăn mă bruă ti Việt Nam.

Ti anôk drông, Khua knŭk kna lač, Đảng, knŭk kna lehanăn phung ƀuôn sang Việt Nam dlăng yuôm klei bi mguôp hŏng Lao, lŏ dơ̆ng hyuă kjăp hĭn klei hgŭm mbĭt mâo leh mơ̆ng đưm, lehanăn klei hgŭm bruă kluôm dhuôm Việt Nam –Lao, mâo leh phung nao êlâo ksul mbŭ mjut mjing. Hdră êlan sa anăn mơ̆ng Việt Nam jing lŏ dơ̆ng hŏng jih ai tiê hrăm mbĭt hŏng Lao čiăng mđĭ hĭn klei bi mguôp tliêr kjăp mtrŭn agha êlam hĭn, lehanăn mâo klei tŭ dưn hĭn hlăm djăp mta bruă. Hlăm anăn, klei bi mguôp bruă lĭng kahan Việt Nam – Lao mâo leh knơ̆ng kjăp kyua klei êđăp ênang, hơĭt lehanăn mđĭ kyar hlăm grăp ala čar, lehanăn đru răng kriê klei êđăp ênang alŭ wăl lehanăn tar rŏng lăn./.

Y-Khem pô mblang