VOV4.Êđê- Tlam hruê 18/3, ti Anôk bruă knŭk kna, Khua knŭk kna Phạm Minh Chính drông leh Thomas Vallely, Khua knơ̆ng hdră bruă Việt Nam ti Sang hră gưl prŏng Harvard lehanăn phung thơ̆ng kơ bruă Sang hră gưl prŏng Fulbright Việt Nam. Ti knăm anei, Khua knŭk kna Phạm Minh Chính bi mni klei đru mguôp mơ̆ng Thomas Vallely hlăm bruă mkŏ mjing Sang hră gưl prŏng Fulbright Việt Nam lehanăn h’êč hmưi kơ Sang hră gưl prŏng Fulbright ba wĭt leh lu boh tŭ dưn. Hlăm wưng ară anei, knŭk kna Việt Nam dôk mtrŭt mđĭ hdră msir kñăm lŏ krŭ wĭt, mđĭ kyar bruă duh mkra – ala ƀuôn, mđing čih mkra klei bhiăn, mjing tur knơ̆ng h’ĭt kjăp kơ hdră mđĭ kyar hlăm wưng sui. Hlăm anăn, bi mklă hdră mđĭ lar tuič hnơ̆ng bruă mjuăt bi hriăm anak mnuih, anak mnuih jing pô phŭn lehanăn mta kñăm mđĭ kyar. Mbĭt anăn ăt bi mklă, hluê ngă tŭ dưn hdră mjuăt bi hriăm mbĭt hŏng bruă ksiêm hriăm bruă kreh knhâo jing klei mđing mrô sa, jing boh kdrŭt kñăm mđĭ kyar lăn čar./.

                                                    Pô mblang: H’Nêč Êñuôl