VOV4.Êđê- Tlam hruê 5/9 ti Anôk bruă knŭk kna, Khua knŭk kna Phạm Minh Chính drông leh Bill Winters, Khua knơ̆ng prăk Standard Chartered (Ala mtao Ăngle) dôk čhưn, mă bruă ti Việt Nam. Khua knŭk kna Phạm Minh Chính lač, hlăk tar rŏng lăn dôk mâo dleh dưi ksiêm dlăng, hdră duh mkra – ala ƀuôn Việt Nam wưng êgao ăt mâo dŭm boh tŭ dưn.

Khua knŭk kna bi êdah klei bi mni dŭm anôk bruă duh mkra, phung duh bi liê ala tač êngao, hlăm anăn mâo Knơ̆ng prăk Standard Chartered, hrăm mbĭt, đru kơ Việt Nam gang mkhư̆ klei ruă tưp lehanăn mtrŭt mđĭ hdră krŭ wĭt, mđĭ kyar bruă duh mkra – ala ƀuôn. Khua knŭk kna lač klei mđing mơ̆ng Việt Nam hlăm hdră jak iêu klei duh bi liê mtah lehanăn dŭm ai dưi, klei mâo kñăm mđĭ kyar h’ĭt kjăp, boh nik mđĭ kyar mtah, bi mlih mrô lehanăn mđĭ hdră bi hgŭm hŏng dŭm ƀĭng hgŭm mđĭ kyar, klei bhiăn bruă ngăn prăk lu ala čar lehanăn dŭm êpul group bruă ngăn prăk tar rŏng lăn, hlăm anăn mâo Knơ̆ng prăk Standard Chartered./.

                                                    Pô mblang: H’Nêč Êñuôl