VOV4.Êđê- Tlam hruê mbruê, 9/9, Khua knŭk kna Phạm Minh Chính drông leh Khua Adŭ bruă K’iăng khua knŭk kna Lao Alounxai Sounnalath hriê čhưn, mă bruă ti Việt Nam lehanăn gĭt gai Klei bi kƀĭn trông kah mbha klei thâo hŏng Adŭ bruă knŭk kna Việt Nam hlăm hdră đru kčĕ đru hdră mă bruă kơ Knŭk kna, Khua knŭk kna. Ti knăm anei, Khua knŭk kna mtă hlăm wưng ti anăp, dua Adŭ bruă lŏ pŏk ngă tŭ dưn Hră bi hdơr kơ Hdră kčah hgŭm bruă wưng thŭn 2022-2023; bi hgŭm kah mbha klei thâo hlăm bruă msir mghaih lehanăn pŏk ngă tŭ dưn dŭm hdră bruă, mđĭ hnơ̆ng tŭ hdră đru kčĕ kơ knŭk kna, Khua knŭk kna.

Khua adŭ bruă k’iăng khua knŭk kna Lao mñă ala čar Lao bi mni, čang hmăng srăng krơ̆ng kjăp, ksŭl mbŭ lehanăn mđĭ kyar klei bi mjĕ jăk siam Lao – Việt Nam, pŏk ngă tŭ dưn klei kuôl kă mơ̆ng phung khua gưl dlông dua ala čar, đru mtrŭt mđĭ klei bi mjĕ jăk siam mâo Đảng, knŭk kna, mnuih ƀuôn sang ksŭl mbŭ, kñăm ba wĭt klei tŭ dưn klă sĭt hlăm djăp mta bruă, ba wĭt klei tŭ kơ mnuih ƀuôn sang grăp ala čar./.

                                                    Pô mblang: H’Nêč Êñuôl