Mơ̆ng akŏ thŭn 2023 truh kơ ară anei, kluôm ala mâo giăm 3 êbâo klei pui ƀơ̆ng ngă 134 čô djiê, 101 čô êka, luič liê giăm 230 êklai prăk. Klah čŭn ti anôk bi kƀĭn, Khua knŭk kna Phạm Minh Chính bi mni klei gĭr, boh tŭ mâo dŭm Phŭn, dhar bruă, alŭ wăl, dŭm êpul djŏ tuôm dưi mâo hlăm hdră anei wưng êgao, đru mjing wăl anôk êđăp ênang.

Mbĭt anăn, Khua knŭk kna brei ksiêm dlăng kjăp hdră gang mkhư̆ truih mdjiê klei pui ƀơ̆ng, đru dŏng mnuih mâo klei truh kyua adôk lu klei guan kpăk brei pral mâo hdră msir mghaih. Khua knŭk kna lač klă, bruă kiă kriê, hluê ngă hdră gang mkhư̆ truih mdjiê klei pui ƀơ̆ng, đru dŏng mnuih mâo klei truh ti lu anôk ka ba wĭt klei tŭ dưn. Khua knŭk kna mtă kơ phung Phŭn bruă, Khua anôk bruă sang čư̆ êa dŭm čar, ƀuôn prŏng mă klei hriăm lŏ dơ̆ng hluê ngă kjăp hdră kiă kriê hlăm bruă anei./.