Kơ hdră tă, bruă klam, hdră msir phŭn hlăm thŭn 2024 Khua knŭk kna hlak mblang kơ boh klei dlông rŏng lăn leh anăn hlăm ala čar, mbĭt anăn lač klă kơ hdră kñăm, klei čiăng hlăm thŭn 2024 hlăm anăn mñă, thŭn anei jing thŭn ngă bruă pral, êdah êdi, jing yuôm bhăn hŏng bruă hlue ngă klei tŭ dưi Hdră kčah 5 thŭn 2021 - 2025.

Khua knŭk kna brei thâo, hdră kñăm kluôm jing mđing mđĭ kyar mguôp hŏng krơ̆ng kjăp bruă duh mkra kluôm, ktuê dlăng prăk luč ênoh, rơ̆ng bi kna bruă duh mkra, mđing rơ̆ng klei êđăp ênang ala ƀuôn, mđĭ klei hdĭp mda yang ƀuôn; mkra mđĭ klei êđăp ênang ala ƀuôn, mđĭ klei hgŭm hŏng tač êngao leh anăn ñŭ kma hŏng lu ala čar, răng mgang wăl hdĭp mda êđăp ênang leh anăn klei găl mđĭ kyar lăn čar. Hdră kñăm klă klơ̆ng thŭn 2024 jing rơ̆ng hnơ̆ng đĭ kyar ênoh mnơ̆ng dhơ̆ng hlăm ala čar mâo 6 - 6,5%.