VOV4.Êđê - Hruê 27/1, Khua knŭk kna Phạm Minh Chính, Khua anôk bruă gĭt gai hdră gang mkhư̆ klei ruă Covid 19 (Anôk bruă gĭt gai) mkŏ mjing leh klei bi kƀĭn online hŏng 63 čar, ƀuôn prŏng kơ hdră gang mkhư̆ klei ruă Covid 19, bi trông kơ dŭm bruă klam, hdră msir gang mkhư̆ klei ruă Covid 19, boh nik hlăm wưng têt djuê ana, mprăp lŏ pŏk ƀăng sang hră lehanăn pŏk ƀăng hdră hiu čhưn ênguê, lŏ krŭ wĭt bruă duh mkra – ala ƀuôn. Blŭ hrăm ti anôk bi kƀĭn, Khua knŭk kna Phạm Minh Chính brei thâo, klei bi kƀĭn kñăm ksiêm dlăng, thâo klă klei mâo mơ̆ng klei ruă tưp, boh nik ksiêm dlăng kơ dŭm bruă mrâo bluh mâo, klei năng mđing čiăng pral mâo hdră msir mghaih. Mơ̆ng anăn đru mguôp čiăng kơ mnuih ƀuôn sang dưi drông Têt êđăp ênang, hơ̆k m’ak. Boh nik, bruă mđing truh kơ hdră tlŏ mgang vaccine mjêč mơ̆ng Yan Mnga thŭn 2022. Gĭr truh kơ jih mlan 1/2022 tlŏ ênŭm 2 aruăt vaccine kơ phung hđeh mơ̆ng 12 – 17 thŭn, truh kơ jih 3 mlan gưl 2 thŭn 2022 tlŏ ênŭm aruăt tal 3 kơ mnuih mơ̆ng 18 thŭn kơ dlông./.

H’Nêč pô mblang