VOV4.Êđê - Hruê mbruê, ti anôk bruă knŭk kna, Khua knŭk kna Phạm Minh Chính gĭt gai leh klei kƀĭn knŭk kna kơ tuôr mlan 2 thŭn 2022. Hluê si klei hưn mdah hlăm klei kƀĭn, boh sĭt bruă duh mkra ala ƀuôn mlan 2 leh anăn 2 mlan akŏ thŭn mâo dŭm klei mlih jăk, lŏ dơ̆ng hlăm klei krŭ wĭt hlăm djăp mta bruă wăt kơ bruă tuh tia, bruă lŏ hma, bruă mkăn, krŭ wĭt anôk mă bruă, rơ̆ng kjăp bruă kđi čar, rơ̆ng klei êđăp ênang yang ƀuôn.

Bi kơ bruă klam leh anăn hdră êlan hlăm hruê mmông kơ anăp, Khua knŭk kna ktrâo klă, anei jing hruê mmông yuôm bhăn, čiăng mtrŭt mđĭ leh anăn tui ngă mâo boh tŭ dưn dŭm hdră êlan čiăng jing tur knơ̆ng hlăm klei tui ngă dŭm mta kñăm hlăm jih thŭn. Khua knŭk kna mtă kơ dŭm phŭn, dhar bruă, anôk bruă, alŭ wăl ngă jăk bruă klam, hluê ngă ktang phĭt leh anăn bi leh bruă klam, dŭm hnơ̆ng čoh čuăn mđĭ kyar bruă duh mkra – ala ƀuôn thŭn 2022 dưi bi êdah leh, hlăm anăn kñăm bi leh dŭm hdră mkăp ba mdah hŏng phŭn bruă kđi čar, êpul khua bruă Đảng, rơ̆ng kơ hnơ̆ng tŭ jăk. Lŏ dơ̆ng tui ngă mâo boh tŭ dưn dŭm bruă klam, hdră êlan mơ̆ng hdră krŭ wĭt leh anăn mđĭ kyar bruă duh mkra ala ƀuôn, boh nik jing dŭm bruă klam hlăm wưng tlâo mlan tal 2 thŭn 2022.

Y Bel pô mblang