Hlăm klei kƀĭn, phung bi ala mñă klă, bruă mkŏ mjing sa anôk bruă ngăn prăk alŭ wăl leh anăn tar rŏng ti Việt Nam srăng mkŏ mjing sa knhuang mlih mrâo, iêo jak thiăm ai dưi, mtrŭt mđĭ bruă duh mkra, ba Việt Nam nao hgŭm hlăm klei đĭ kyar bruă duh mkra tar rŏng lăn. Ƀiădah, anei jing boh klei mrâo, dleh đăo tĭng, čiăng mâo klei nao hgŭm mơ̆ng dŭm Phŭn, dhar bruă, alŭ wăl djŏ tuôm. Bi klă hlăm mmông mă bruă, Khua knŭk kna Phạm Minh Chính lač klă klei čiăng êdi mơ̆ng bruă mkŏ mjing dŭm hdră êlan.

Bruă mkŏ mjing hdră êlan anei jing bi klă hdră êlan mơ̆ng Đảng, kyuanăn čiăng mâo hdră ngă bruă hmar, tŭ dưn hĭn, ba yua klei găl mâo mơ̆ng lăn čar, ai tiê mă êjai pŏk mlar êjai, amâo mâo ruăt kkuăt. Srăng ruah dŭm hdră jăk hĭn mơ̆ng 3 klei bi hmô anôk bruă ngăn prăk tar rŏng lăn, găl guôp hŏng hdră bhiăn tar rŏng lăn leh anăn klei găl mơ̆ng Việt Nam mâo hdră êlan klă klơ̆ng.