VOV4.Êđê- Ti anăp klei dleh dưi ksiêm dlăng, dleh đăo knăl, čiăng dưi rơ̆ng kjăp leh anăn bi lar dŭm boh tŭ dưi mâo hlăm bruă gang mkhư̆ klei ruă tưp, lŏ dơ̆ng pŏk ƀăng, mtrŭt mđĭ bruă krŭ wĭt leh anăn mđĭ kyar bruă duh mkra, ala ƀuôn, Khua knŭk kna Phạm Minh Chính mâo asăp mtrŭn mtă kơ Dŭm anôk bruă kđi čar, dŭm phŭn, dhar bruă, gưl bruă, mnuih ƀuôn sang leh anăn knơ̆ng bruă čiăng mâo ai tiê kjăp, amâo dưi ngă ngơi mang, luč klei răng, amâo huĭ hyưt, rŭng răng hlăm bruă gang mkhư̆ klei ruă tưp Covid-19, lŏ dơ̆ng mtrŭt mđĭ, tui ngă jăk dŭm bruă kñăm, hdră êlan mâo leh Đảng, knŭk kna ba mdah, mkŏ mjing jăk, ktang phĭt, mâo boh tŭ dưn hlăm bruă tlŏ mgang vaccine, hmao mâo dŭm hdră mdrao mgŭn, êa drao, mbĭt anăn mđĭ hĭn klei thâo săng hluê ngă djŏ, mâo boh tŭ dưn dŭm hdră êlan gang mkhư̆ klei ruă tưp kơ mnuih ƀuôn sang… Hluê anăn, dŭm alŭ wăl čiăng mtrŭt mđĭ ktang leh anăn hmar hĭn bruă tlŏ mgang vaccine aruăt tal 3 kơ phung mơ̆ng 18 thŭn kơ dlông, bi leh hlăm wưng tlâo mlan tal 1 thŭn 2022, tlŏ mgang aruăt tal 2 kơ hđeh mơ̆ng 12 truh kơ 18 thŭn, bi leh hlăm mlan 2 thŭn 2022, mprăp ênŭm klei găl kơ mnơ̆ng yua, kdrăp yua, kdrăp kriê pioh, anôk ngă bruă, mnuih mă bruă čiăng tlŏ mgang kơ hđeh mơ̆ng 5 truh kơ 12 thŭn leh mâo klei mkăp brei vaccine.

Pô mblang: Y-Ƀel Êban