VOV4.Êđê- Aguah 24/3, Khua knŭk kna Phạm Minh Chính gĭt gai Klei bi kƀĭn online kluôm ala hŏng anôk bruă duh mkra knŭk kna kơ klei “Lŏ dơ̆ng mlih mrâo, mđĭ klei tŭ dưn ngă bruă kñăm iêô jăk klei găl mơ̆ng anôk bruă duh mkra hlăm bruă mđĭ kyar bruă duh mkra- ala ƀuôn”.  Khua knŭk kna lač klă, Klei bi kƀĭn mkŏ mjing hlăm boh klei ala čar dôk ngă Hdră kơrŭ wĭt bruă duh mkra hlue si dŭm Hdră mtrŭn mơ̆ng Đảng, Bruă kƀĭn ala leh anăn Knŭk kna. Knŭk kna ngă leh anăn dôk ngă tŭ dưn klei blŭ “ Mdrơ̆ng êđăp ênang, mbruă, ksiêm dlăng tŭ dưn klei ruă tưp Covid-19”, mjing tur knơ̆ng kơrŭ wĭt pral, mđĭ kyar hơĭt kjăp bruă duh mkra ala ƀuôn.

Knŭk kna bi mklă bruă duh mkra knŭk kna krơ̆ng bruă phŭn leh anăn jing sa êpul yuôm bhăn hlăm bruă duh mkra knŭk kna, đru hơĭt kjăp bruă duh mkra kluôm leh anăn mđĭ kyar bruă duh mkra ala ƀuôn. Khua Knŭk kna mtă, brei knŭk kna bi trông, ba hdră kčah, bruă klam, hdră msir klă klơ̆ng kơ grăp êpul leh anăn alŭ wăl, grăp êpul grup, knơ̆ng bruă, anôk bruă duh mkra knŭk kna čiăng thâo săng djŏ, msir mgaih djŏ guôp leh anăn ngă bruă jih ai tiê, tŭ dưn hĭn.

Pô mblang: H’Zawut Ƀuôn Yă