Knăm mơak yan hla luh tal 1 thŭn 2025 dưi mkŏ mjing hŏng hnơ̆ng prŏng êdi mơ̆ng êlâo adih truh kơ ară anei ti Việt Nam, jak iêu 2.500 anôk bruă duh mkra, mkŏ mjing hlăm lehanăn êngao ala čar. Hŏng akŏ “Bi mguôp Anak mnuih lehanăn hdră pla mjing, mnia mblei”, hdră mnia mblei dưi mkŏ mjing hŏng klei mčhĭt mơuăt, dŭm êbâo hdră mnia mblei, klei kuôl kă lehanăn hră bi hdơr hgŭm bruă duh bi liê, ba jao kdrăp mrâo plah wah dŭm anôk bruă duh mkra hlăm ala čar, anôk bruă duh mkra Việt Nam hŏng ala tač êngao dưi siñê, hŏng ênoh prăk bi mnia mblei giăm 5.000 êklai prăk.

Knăm mơak ăt jing knăm mơ̆ng hdră kdrăp mlih mrâo lehanăn dhar kreh kdŏ mmuñ, anôk bi mklă boh tŭ yuôm hdră “Mđĭ kyar bruă duh mkra nao mbĭt hŏng hdră mđĭ kyar dhar kreh, ala ƀuôn lehanăn anak mnuih”. Blŭ ti knăm mjưh ruê̆, Khua knŭk kna Phạm Minh Chính mñă klă, Knăm mơak anei jing sa hdră tŭ dưn kñăm mtrŭt mđĭ hdră blei yua hlăm ala čar – sa boh kdrŭt yuôm đru mtrŭt mđĭ hdră pla mjing lehanăn ba čhĭ kơ ala tač êngao, sa hdră ngă mrâo bi mguôp boh kdrŭt đĭ kyar mơ̆ng đưm – sa hdră bi hgŭm buă mnia mblei mrâo, mjing tur knơ̆ng đĭ kyar kơ wăl anôk mnia mblei hlăm ala čar hlăm ênuk mrô. Khua knŭk kna ăt lač jăk klei đru mbĭt mơ̆ng jih jang êpul êya hŏng mnuih ƀuôn sang krĭng êa lip lêč hluê hdră “Yan hla luh čang hmăng”, hŏng ênoh đru êbeh 316 êklai prăk. Khua knŭk kna mñă leh ai tiê thâo bi đru anei jing klei bi êdah jăk siam mơ̆ng knhuah gru “Klei khăp djuê ana, klei khăp mnuih ƀuôn sang”, mơ̆ng djuê ana drei, jing tur knơ̆ng lehanăn ai ktang čuăng kơ ala čar drei hơĭt kjăp ti ktuê êlan đĭ kyar./.