VOV4.Êđê - Tlam mbruê 14/10, ti sang bruă kƀĭn ala mkŏ mjing klei kƀĭn trông êpul bruă Đảng bruă kƀĭn ala hŏng êpul bruă Đảng knŭk kna kơ bruă mprăp klei kƀĭn tal 4, bruă kƀĭn ala gưl 15.

Khua knŭk kna Phạm Minh Chính, Khua bruă kƀĭn ala Vương Đình Huệ nao hgŭm gĭt gai klei kƀĭn. Hluê si khua kiă kriê adŭ bruă Kƀĭn ala Bùi Văn Cường, hlăm gưl kƀĭn anei, Bruă kƀĭn ala srăng mă bruă hlăm 21 hruê, êngao kơ dŭm hdră klei bhiăn dưi brei leh boh blŭ leh anăn bi klă, ăt lŏ mâo lu boh klei ngă truh lu klei bi čôñ ăl mâo phung bi ala leh anăn mnuih ƀuôn sang uêñ mĭn srăng mâo phung bi ala bruă kƀĭn ala mñă brei hlăk mblang hlăm klei bi trông kơ dŭm klei hưn mdah bruă duh mkra – ala ƀuôn, ngăn prăk ala čar amâodah dŭm klei ksiêm êmuh.

Blŭ hlăm klei kƀĭn, Khua knŭk kna yap yuôm bhăn bruă mprăp kơ klei kƀĭn tal 4 mơ̆ng bruă kƀĭn ala, bruă bi mguôp mprăp kơ klei kƀĭn dưi hluê ngă ktang phĭt, djŏ hdră êlan. 2 tĭng bi mguôp kjăp, mâo boh tŭ dưn, dŭm hdră klei bhiăn dưi bi trông klă nik. Dŭm Dhar bruă mơ̆ng bruă kƀĭn ala leh anăn phŭn dhar bruă mâo leh klei bi mguôp, mkŏ mjing, bruă hưn mdah dŭm mta hră mơar dưi ngă hmar hĭn, mâo hnơ̆ng tŭ jăk hĭn.

VOV TâyNguyên/ Pô mblang: Y-Ƀel Êban