VOV4.Êđê- Aguah mbrue (1/7), ti Daklak, Khua knŭk kna Phạm Minh Chính kiă kriê klei bi kƀĭn ksiêm wĭt bruă hlue ngă hdră mtrŭn mrô 10-NQ/TW hrue 18/01/2002 lehanăn klei klah čŭn mrô 12-NQ/TW hrue 24/10/2011 mơ̆ng Phŭn bruă kđi čar kơ klei mđĭ kyar bruă duh mkra ala ƀuôn, lehanăn bruă răng mgang klei êđăp ênang hlăm krĭng Lăn Dap kngư. Ti anôk bi kƀĭn, phung bi ala trông čhai kơ bruă hlue ngă, lehanăn boh tŭ dưn leh mâo, klei awăt, klei ka dưi ngă, lehanăn phŭn agha leh 20 thŭn hlue ngă hdră mtrŭn mrô 10-NQ/TW lehanănklei klah čŭn mrô 12-KL/TW, bi klă anôk, bruă klam, klei găl, klei yuôm bhăn lehanăn klei hmăi kơ krĭng lăn dap kngư hlăm bruă mđĭ kyar klei duh mkra ala ƀuôn, bruă răng mgang klei êđăp ênang hlăm krĭng mbĭt hŏng krĭng Ngŏ kwar Dhŭng, krĭng ktue hang ksĭ kwar Krah, krĭng 3 kiêng mđĭ kyar Việt Nam - Lao - Campuchia lehanăn hlăm kluôm ala...

Blŭ hrăm ti anôk bi kƀĭn, Khua knŭk kna Phạm Minh Chính hlak mblang kơ dŭm klei găl, lehanăn lač mơh kơ klei awăt êdu, klei kƀah. Khua knŭk kna mñă: Mđĭ kyar krĭng Lăn Dap kngư bi nwang mghaih msir mđrăm jih jang dơ̆ng mơ̆ng bruă kđi čar, kơ klei mĭn, kơ bruă duh mkra ala ƀuôn kơ wăl hdĭp mda, lehanăn bruă răng mgang klei êđăp ênang, bi mguôp kjăp hŏng klei mđĭ kyar bruă duh mkra, lehanăn mghaih msir jih kơ bruă yang ƀuôn, kơ hdră êlan djuê ana, klei đăo, lŏ bi kơrŭ ai tiê myưng m’ang, mjing klei tŭ dưn bruă hƀuê ênuk dhar kreh, knhuah gru cách mạng, ai tiê êpa mhao kpưn đĭ, čŏng pô mâo klei gĭr lehanăn thâo bi mguôp, mjing boh kdrŭt kơ klei mđĭ kyar./.

Pô mblang: Y-Khem Niê