VOV4.Êđê- Aguah mbrue (15/9), Khua knŭk kna Phạm Minh Chính kiă kriê leh klei bi kƀĭn mđĭ hĭng klei bi mlih bruă hră mơar lehanăn djŏ hŏng hdră mrâo mrang hlăm jih jang bruă kiă kriê, gĭt gai pioh ngă bruă hŏng phung ƀuôn sang lehanăn phung duh mkra. Klei bi kƀĭn anei dưi mkŏ online truh hŏng 63 boh car, ƀuôn prŏng hlăm kluôm ala. Blŭ hrăm ti anôk bi kƀĭn, Khua knŭk kna Phạm Minh Chính ktrâo klă, bruă mđĭ mlih hră mơar mâo nanao leh klei Đảng, knŭk kna yap jing bruă yuôm bhăn kñăm mkŏ mjing, bi leh bruă knŭk kna mâo klei dưi hlăm yang ƀuôn ngă phŭn êngiê, hlăm klei klă mngač, kjăp ktang, mâo klei tŭ dưn, kyua klei ngă bruă kơ ƀuôn sang, kyua klei mđĭ kyar lăn čar.

Khua knŭk kna mñă, kyua klei gĭr prŏng hlăm jih bruă kđi čar, lehanăn jih jang phung ƀuôn sang, drei mâo leh dŭm knhuang yuôm bhăn bi mlih bruă hră mơar, boh nik hlăm hdră mă bruă, lŏ bi kơrŭ ai dưi hlăm bruă mđĭ kyar lăn čar, mđĭ klei tŭ dưn hlăm bruă kiă kriê mâo mbha gưl leh. Siămdah, hŏng jih jang boh tŭ dưn leh mâo, ăt adôk lu mơh klei ăăt kƀah, năng pral mâo klei bi mlih mtam, kñăm pral mâo hdră êlan mghaih msir jăk, dưn yua jih klei găl pioh kơ bruă mđĭ kyar lăn čar êjai boh klei msĕ si ară anei./.

Pô mblang: Y-Khem Niê