VOV4.Êđê - Tlam mmăt mbrue (19/9), ti anôk bruă knŭk kna, Klei bi kƀĭn online mâo Khua knŭk kna mkŏ mjing hŏng phung khua bi ala knŭk kna Việt Nam ti ala tač êngao kơ klei mđĭ hĭn bruă hŏng tač êngao hlăm klei duh mkra, mâo mkŏ mjing leh tlă anăp lehanăn hŏng onlie. Anei jing klei bi kƀĭn tal êlâo khua knŭk kna kiă kriê klei bi kƀĭn kơ bruă hŏng tač êngao hlăm klei duh mkra.

Klei bi kƀĭn mđing trông čhai, ksiêm wĭt djăp mta klei găl lehanăn klei amâo mâo găl hŏng boh klei msĕ si ară anei, boh nik ya mta jing găl djŏ hŏng Việt Nam srăng bi pai mă, boh nik hlăm klei bi mnia mblei hŏng ala tač êngao, kơ klei duh bi liê lehanăn bruă hiu čhưn ênguê, kñăm lŏ kơrŭ wĭt bruă duh mkra, mơ̆ng anăn mâo djăp hdră mđĭ hĭn klei bi mguôp duh mkra wăt hlăm ala tač pô lehanăn hglăm ala tač êngao, kñăm dưi găn jih klei dleh dlan dôk găn tinăp, lehanăn mjing ai bluh đĭ hlăm bruă duh mkra. Blŭ hrăm ti anôk bi kƀĭn, Khua knŭk kna Phạm Minh Chính mtă kơ jih jang phung khua bi ala kơ knŭk kna, jih jang dŭm phŭn dhar bruă, phung duh mkra mđĭ hĭn klei thâo mĭn, bi trông duah djăp hdră bi mguôp hŏng ala tač êngao hlăm klei duh mkra, bi êdah dŭm hdră êlan, klei čang hmăng, klei akâo kơ klei bhiăn, hdră êlan, mnuih ngă bruă kñăm mđĭ hĭn boh tŭ dưn klei bi mguôp hŏng ala tač êngao hlăm klei duh mkra./.

Y-Khem pô mblang