Ti anôk hưn mdah klei bi mklă mơ̆ng khua knŭk kna kơ bruă mkŏ mjing dhar bruă ala čar APEC 2027 mâo 19 čô, hlăm anăn, k’iăng khua knŭk kna, Khua phŭn bruă hŏng tač êngao Bùi Thanh Sơn jing khua kiă kriê Dhar bruă ala čar APEC 2027. Blŭ hrăm hlăm knăm bi êdah, Khua knŭk kna Phạm Minh Chính mñă: Anei jing bruă yuôm bhăn hŏng Việt Nam kñăm mtrŭt pral bruă prăp êmiêt kơ thŭn APEC 2027 – sa bruă čuăn kđi čar mjĕ mgiăm hŏng ala tač êngao mơ̆ng Việt Nam. 

Khua knŭk kna čang hmăng hŏng klei bi sai ai, jih ai tiê mă bruă mơ̆ng Việt Nam, mâo klei sa ai mơ̆ng dŭm ala čar hgŭm lehanăn êpul khua kiă kriê APEC, Thŭn APEC 2027 srăng mâo klei tŭ jing jăk mơak đru mđĭ klei bi hgŭm APEC nao hlăm sa knhuang mrâo, djŏ hŏng klei čang hmăng kơ klei êđăp ênang, hgŭm mbĭt mđĭ kyar mdrŏng sah ti Asi – Pacific lehanăn hlăm tar rŏng lăn./.