VOV4.Êđê - Tlam hruê 6/2, lŏ dơ̆ng hdră ksiêm dlăng, mđĭ dŭm hdră bruă phŭn hlăm bruă êlan klông dŭ mdiăng, Khua Knŭk kna Phạm Minh Chính nao ksiêm dlăng, mđĭ, păn kjăp boh klei, msir mgaih klei dleh dlan, gun kpăk leh anăn mđĭ ai, hơêč hmưi Tết kơ êpul knuă druh, mnuih mă bruă dôk mă bruă hlăm anôk dôk rŭ mdơ̆ng êlan dơ̆ng êran pral Mỹ Thuận – Cần Thơ leh anăn hdră bruă kban Mỹ Thuận 2. Êlan dơ̆ng êran pral Mỹ Thuận - Cần Thơ găn 2 čar Vĩnh Long, Đồng Tháp.  Leh êlan dơ̆ng êran pral anei bi leh. Bi mguôp hŏng ktuê êlan ƀuôn prŏng Hồ Chí Minh - Trung Lương, Trung Lương - Mỹ Thuận leh anăn kban Mỹ Thuận 2, mjing ktuê êlan dơ̆ng êran pral mơ̆ng ƀuôn prŏng Hồ Chí Minh - Cần Thơ, đru mguôp bi hrŏ klei dleh dlan hlăm êlan klông, klei bi drăm hlăm êlan dơ̆ng ala čar mrô 1. Tinei, Khua knŭk kna mtă kơ čar Vĩnh Long leh anăn čar Đồng Tháp mjêč bi leh bi jih bruă ruh mgaih anôk ala kơ hdră bruă; dŭm anôk bruă djŏ tuôm bi hgŭm tliêr kjăp čiăng mđĭ hnơ̆ng 3 mlan leh anăn mđĭ hnơ̆ng jăk. Khua Knŭk kna sa blư̆ dơ̆ng mtă kơ bruă pŏk ngă dŭm hdră bruă êlan dơ̆ng êran pral brei tui hluê si êlan kpăk, đŭt hĭn, dŭm alŭ wăl brei mđĭ ai tiê čŏng ngă bruă, duh bi liê mâo boh phŭn, amâo dôk čang guôn ôh hlăm gưl dlông hlăm bruă mkŏ mjing dŭm hdră bruă êlan dơ̆ng êran pral.

H’Zawut pô mblang