Anei jing gưl hriê čuă klă klơ̆ng tal êlâo êngao Ơrôp mơ̆ng Khua knŭk kna Luxembourg hlăm thŭn 2023, mbĭt anăn jing gưl nao čuă Việt Nam tal êlâo mơ̆ng Khua knŭk kna Luxembourg hlăm êbeh 20 thŭn êgao. Aguah mbruê, knăm tŭ drông klă klơ̆ng Khua knŭk kna Luxembourg Xavier Bettel dưi mkŏ mjing kdrưh kơăm ti Hà Nội. Leh kơnăn, 2 čô Khua knŭk kna bi trông kơ dŭm klei đĭ kyar mrâo hlăm klei mjĕ giăm 2 tĭng. Hlăm klei blŭ hrăm, Khua knŭk kna Phạm Minh Chính mñă klă yap yuôm bhăn klei bi hgŭm leh anăn bi mguôp lu mta hŏng Luxembourg.

Dua čô Khua knŭk kna bi trông kluôm kơ boh sĭt bruă duh mkra – ala ƀuôn grăp ala čar, klei mjĕ giăm bi mguôp 2 tĭng leh anăn dŭm boh klei hlăm alŭ wăl, tar rŏng lăn dôk bi mđing. Dua čô Khua knŭk kna tŭ ư kơ dŭm hdră êlan kñăm mtrŭt mđĭ klei bi hgŭm leh anăn bi mguôp lu mta plah wah 2 ala čar, boh nik jing mđĭ hĭn klei bi trông êpul dŭm gưl, boh nik jing gưl dlông ăt msĕ hŏng hluê ngă tŭ dưn dŭm hdră êlan bi mguôp 2 tĭng, ksiêm duah mkŏ mjing dŭm hdră bi mguôp mrâo djŏ guôp hŏng klei găl, klei čiăng bi mguôp, mđĭ kyar plah wah 2 ala čar.