VOV4.Êđê- Hrue mbrue (11/9), Khua knŭk kna Phạm Minh Chính mâo leh mmông mă bruă hŏng Êpul grŭp êa pui êwa čuh ala čar Việt Nam. Klei mă bruă anei mâo mkŏ mjing ti anôk bruă mơ̆ng PVN ti Hà Nội dưi mkŏ hŏng 13 anôk jing êpul êya knơ̆ng mơ̆ng Petrovietnam hlăm kluôm ala, jih jang bruă êa pui êwa čuh, anôk ktir mă êa pui hlăm êa ksĭ Việt Nam lehanăn bruă hgŭm hŏng Russia dôk hlăm Petrovietnam. Leh hmư̆ jih jang klei blŭ hrăm, klah čŭn ti anôk mă bruă anăn, Khu aknŭk kna Phạm Minh Chính bi mni kơ ai tiê thâo gĭr, klei bi mguôp, klei mă bruă hŏng klei knhăk, găn jih klei dleh dlan čiăng krơ̆ng klei đĭ kyar mơ̆ng êpul grŭp.

Khua knŭk kna mñă, knư̆ găn klei dleh dlan, klei ktrŏ hlăm bruă knuă, knư̆ hĭn mơh brei mâo klei thâo bi mguôp, mă bruă hŏng klei thâo mĭn, jhŏng mĭn jhŏng ngă kyua klei tŭ dưn kơ lăn čar, kơ djuê ana. Mta kñăm yuôm bhăn hĭn jing amâo mâo dưi kƀah ê apui êa săng pioh yua ôh. Bi rŭ mdơ̆ng êpul grŭp êa pui, êwa čuh jing êpul grŭp duh mkra prŏng, mă bruă mâo klei tŭ jing, jing anôk duh mkra knơ̆ng hlăm bruă čiăng bi mâo djăp êa săng êa pui yua, đru kơ bruă mđĭ kyar klei duh mkra, mđĭ kyar lăn čar./.

Pô mblang: Y-Khem Niê