VOV4.Êđê- Tlam mbruê, Khua knŭk kna Phạm Minh Chính gĭt gai klei kƀĭn hŏng dŭm phŭn, dhar bruă kơ bruă gang mkhư̆ klei ƀơ̆ng ngăn hlăm knŭk kna leh anăn bruă sang čư êa alŭ wăl. Hlăm klei kƀĭn anăn, Khua knŭk kna Phạm Minh Chính ktrâo klă dŭm boh klei adôk mâo hlăm bruă gang mkhư̆ klei ƀơ̆ng ngă, msĕ si đa đa phŭn bruă, anôk bruă, alŭ wăl ka ktang phĭt ôh hlăm bruă gang mkhư̆ klei ƀơ̆ng ngăn, mâo dŭm klei ngă soh msĕ si ti knơ̆ng bruă Việt Á, amâodah dŭm klei ngă soh bi lông ruah pô ngă bruă, bi lông mđĭ ênoh blei hlăm dŭm thŭn giăm anei.

Bi kơ bruă klam thŭn 2022, Khua knŭk kna mta srăng ngă djŏ klei gĭt gai mơ̆ng Đảng, klă klơ̆ng jing hdră mtrŭn leh anăn hră mơar gĭt gai mơ̆ng êpul gĭt gai, dŭm bruă klam ba mdah leh hlăm klei kƀĭn trông bruă knuă ala čar hlăm klei dưi mơ̆ng knŭk kna, dŭm anôk bruă knŭk kna leh anăn bruă sang čư êa alŭ wăl. Mđĭ hĭn bruă ksiêm duah, mđi bruă klam pô ba anăp. Khua knŭk kna mta brei ngă ktang bruă bi klă, ksiêm duah, ƀuah mkra dŭm klei ngă soh mâo phung ktuê dlăng uêñ mĭn msĕ hŏng klei ngă soh Việt Á djŏ hŏng klei bhiăn ala čar.

Pô mblang: Y-Ƀel Êban