Khua knŭk kna mtă kơ dŭm alŭ wăl pral krŭ wĭt anôk bruă pui kmlă, êa yua, êlan klông, bruă hâo hưn êlan kbưi. Lŏ dơ̆ng ksiêm dlăng, ba nao djăp kdrăp mnơ̆ng đru kơ mnuih ƀuôn sang, amâo lui mnuih ƀuôn sang ư̆ êpa, mbĕ mnuih ƀuôn sang nao dôk kơ anôk êđăp ênang, rơ̆ng bruă mkăp brei dưi hluê ngă hlăm hruê 14/11, mbĭt anăn lŏ dơ̆ng iêu mthưr dŭm anôk bruă duh mkra, phung mâo ai tiê kmah hŏng “Klei khăp djuê ana, klei khăp mnuih ƀuôn sang” lŏ dơ̆ng đru mbĭt čiăng hgao jih klei dleh dlan.

Êlâo anăn, hlăm gưl mă bruă ti Gia Lai, yang hruê dơ̆ng 13/11, Khua knŭk kna Phạm Minh Chính nao čuă, mă leh bruă hŏng Lĭng kahan răng mgang knông lăn čar Gia Lai, gĭt gai klei bi kƀĭn hŏng dŭm Phŭn, dhar bruă knơ̆ng mơ̆ng Gia Lai kơ hdră msir mghaih klei truh mơ̆ng angĭn êbŭ mrô 13 ngă. Khua knŭk kna brei čar mkăp mtam 60 êklai prăk čiăng mkra anôk dôk mrâo hlăm boh klei mjêč, rơ̆ng kơ mnuih ƀuôn sang mâo anôk dôk mrâo. Mñă bruă mjêč ară anei jing krŭ wĭt hdră duh mkra pla mjing, mnia mblei. Khua knŭk kna mtă kơ dŭm êpul nao đru huai mdoh, mkra mđĭ mđing kơ hdră duh mkra pla mjing. Anôk bruă knơ̆ng prăk brei bi kdung êjai ênoh prăk čan, mâo hdră đru kơ anôk bruă duh mkra msir mghaih klei truh mơ̆ng angĭn êbŭ mrô 13 ngă, bi hrŏ prăk jia, prăk tăk; pral mâo hdră mđing đru kơ dŭm sang hră lehanăn anôk bruă mdrao mgŭn. Čar Gia Lai đăo tĭng ênoh luič liê truh 5.900 êklai prăk. Khua knŭk kna jao kơ Phŭn bruă Ngăn prăk brei bi knar boh klei dôk mâo čiăng mơ̆ng anăn pral mâo hdră đru djŏ guôp./.