Khua knŭk kna Phạm Minh Chính mtă kơ Phŭn bruă Sang hră mơar, dŭm Phŭn, dhar bruă gưl dlông lehanăn alŭ wăl mđing hluê ngă 9 bruă klam phŭn, mâo: Mđing pŏk ngă Klei klah čŭn mrô 91 mơ̆ng Phŭn bruă kđi čar lŏ hluê ngă Hdră mtrŭn Mlih mrâo, mđĭ boh tŭ hdră kriê dlăng mơ̆ng knŭk kna hlăm bruă Mtô bi hriăm; Mđĭ hnơ̆ng thâo êpul knuă druh, nai mtô kriê dlăng bruă mtô bi hriăm, djŏ hŏng klei dôk čiăng lehanăn hlăm wưng mlih mrâo anôk bruă Mtô bi hriăm; Ksiêm dlăng, tĭng mkă kluôm kơ bruă mlih mrâo hdră mtô bi hriăm, hdruôm hră; Phŭn bruă Sang hră mơar lehanăn dŭm alŭ wăl mprăp hdră kčah mkŏ mjing jăk Klei bi lông hriăm jih gưl tlâo thŭn 2025 hluê Hdră mtô bi hriăm mrâo.

"Ti anăp thŭn hriăm mrâo 2024 – 2025, hơêč hmưi kơ jih jang êpul knuă druh kriê dlăng, nai mtô mđĭ lar ai tiê đua klam lehanăn hur har kơ bruă, msir mgaih djăp klei dleh dlan, hgao klei lông dlăng, gĭr krơ̆ng kjăp mta kñăm mlih mrâo kluôm dhuôm bruă mtô bi hriăm, djŏ hŏng klei čang hmăng mơ̆ng Đảng, Knŭk kna lehanăn mnuih ƀuôn sang, ba djuê ana Việt Nam jing sa djuê ana kreh dhar, knhâo, msĕ si Khua gĭt gai Hồ Chí Minh čang hmăng. Hơêč hmưi kơ thŭn hriăm mrâo 2024 - 2025 tŭ jing jăk siam, phung nai mtô suaih pral, yâo mơak đru mguôp lu hĭn kơ hdră “Mjuăt bi hriăm anak mnuih”, phung nai mtô, hđeh hriăm hră jing phung čô anak jăk ênang, thâo mĭn, hlue ngă tŭ jing klei pô čang hmăng, đru mguôp mkŏ mkra ƀuôn sang, lăn čar sah mdrŏng.