Bruă anei mâo boh taih hlăm brô 519km, găn hlăm 9 boh čar, hŏng ênoh duh bi liê jih jang hlăm brô 22 êbâo êklai prăk, mphŭn mă bruă mơ̆ng akŏ thŭn anei. Truh ară anei, mrâo bi leh bruă ruh mgaih anôk ala, bruă tuh jơ̆ng kmeh, mprăp leh djăp kdrăp êlan klei pui pioh kơ bruă dhiang klei pui kmlă. Dŭm kdrêč bruă adôk ka leh ti dŭm boh čar Nghệ An, Hà Tĩnh; hlăk dôk ngă hŏng klei mjêč kñăm čiăng dưi bi êran pui hlăm hrue 19/8/2024.

Khua knŭk kna Phạm Minh Chính mñă, êlan klei pui kmlă 500kV aruăt mtlâo jing yuôm bhăn snăk mđĭ ênoh mkăp pui kmlă kơ kwar dưr, čiăng mâo djăp pui pioh kơ bruă duh mkra, lehanăn kơ mnuih ƀuôn sang yua Khua knŭk kna jao bruă kơ grăp phŭn knơ̆ng dhar bruă, kiă kriê bi kjăp êpul ngă bruă, bi đru kñăm bi leh pral ƀruă knuă djŏ hŏng hrue kčah jao./.