VOV4.Êđê - K’iăng khua knŭk kna Phạm Bình Minh mrâo bi klă leh hră mtrŭn mđĭ hĭn bruă bi liê ngăn prăk ODA, jing prăk čan mơ̆ng ala tač êngao. Hlăm hră mtrŭn lač klă: Ară anei, klei ruă tưp Covid 19 hlăk dưi ksiêm dlăng leh hlăm kluôm ala. Bruă duh bi liê mơ̆ng knŭk kna, hlăm anăn mâo prăk mơ̆ng ODA, jing prăk čan mơ̆ng ala tač êngao dưi yap jing sa hlăm dŭm hdră kñăm lŏ bi kơrŭ bruă duh mkra, čiăng bi leh mta kñăm mđĭ kyar bruă duh mkra ala ƀuôn thŭn 2022. Čiang bi liê pral ênoh prăk ODA mđĭ klei tŭ dưn ba yua, lehanăn đru mguôp yuôm bhăn pioh kơrŭ wĭt bruă duh mkra, ktưn bi liê jih ênoh prăk ODA mâo čan leh hlăm thŭn 2022, Khua knŭk kna mtă kơ jih jang phŭn dhar bruă gưl dlông lehanăn alŭ wăl lŏ dơ̆ng bi kjăp hlue ngă djăp mta mtrŭn mơ̆ng Đảng, Bruă kƀĭn ala, knŭk kna lehanăn klei gĭt gai mơ̆ng khua knŭk kna kơ bruă duh bi liê kluôm, hlăm anăn mâo wăt prăk ODA, dlăng ênoh bi liê mơ̆ng ODA jing bruă čuăn phŭn hlăm thŭn anei, lehanăn hlăm dŭm thŭn kơ anăp./.

Y-Khem pô mblang