VOV4.Êđê- Tlam mbruê, khua knŭk kna mâo leh asăp mtrŭn ba m’ĭt kơ Khua anôk bruă sang čư̆ êa dŭm čar, ƀuôn prŏng kwar Krah, dŭm Phŭn, dhar bruă djŏ tuôm, anôk bruă klei mrâo gưl dlông, alŭ wăl, Anôk bruă gĭt gai hdră mdrơ̆ng hŏng klei yan adiê ngă lehanăn Dhar bruă ala čar mdrơ̆ng hŏng klei truh tăm mâo lehanăn đru dŏng mnuih mâo klei truh. Asăp mtrŭn lač klă: Kyua hmăi mơ̆ng gưl angĭn ê’ăt, kwar krah srăng mâo hjan prŏng hlăm wưng ti anăp, huĭ srăng mâo êa lip lêč, klưh lăn, êngăp êa ti dŭm krĭng tlung hmăi truh kơ klei hdĭp, klei găn êrô mnuih ƀuôn sang.

Khua knŭk kna gĭt gai Anôk bruă sang čư̆ êa dŭm čar, ƀuôn prŏng krĭng kwar Krah ksiêm dlăng kjăp klei mâo mơ̆ng yan adiê, mâo hdră mbĕ mnuih ƀuôn sang mơ̆ng krĭng huĭ hyưt; mtô mblang, mtrŭt mjhar mnuih ƀuôn sang hluê ngă kjăp hdră rơ̆ng klei êđăp ênang, bi hrŏ klei luič liê kyua adiê hjan, êa lip; pral mâo hdră mkăp mnơ̆ng ƀơ̆ng huă kơ mnuih ƀuôn sang ti krĭng bi ktlah kyua êngăp êa, mprăp đru kơ gŏ sang huĭ tlă anăp hŏng klei ư̆ êpa, amâo djăp mnơ̆ng ƀơ̆ng huă./.

                                                    Pô mblang: H’Nêč Êñuôl