VOV4.Êđê - Hrue mbrue (6/2), khua knŭk kna Phạm Minh Chính lehanăn êpul ngă bruă mơ̆ng knŭk kna nao ksiêm dlăng leh anôk, mtrŭt mjhar, mđĭ ai mnuih dôk rŭ mkra tač êdeh phiơr prŏng Long Thành. Bruă mkra gưl tal êlâo tač êdeh phiơr prŏng anei mâo leh khua knŭk kna bi klă kơ hdră tal êlâo hlăk hrue 1/1/2020, mă bruă mơ̆ng thŭn 2020 – 2025. Nao ksiêm dlăng bruă dôk ngă, Khua knŭk kna Phạm Minh Chính dôk bĭ mĭn, truh kơ ară anei lu bruă ăt ka dưi ngă hŏng klei jăk ôh. Tui si Khua knŭk kna, klei mĭn, kdră mkŏ mjing, bi mlih hdră ngă bruă, kiă kriê kjăp bruă knuă, khăp kơ bruă, snăn kơh mdjĕ hĭn, ngă jih ai tiê: “Mtă kơ jih jang phŭn dhar bruă, êpul êya mă bruă hŏng klei klă mngač, mâo ai tiê đua klam, hlăm klei thâo gĭr, jih jang bi krăp mă bruă mđrăm mbĭt”. Khua knŭk kna mtă, jih jang dŭm êpul êya bi mđing trông čhai mghaih msir djăp mta bruă bi djŏ hŏng grăp mlan mdê mdê./.

Y -Khem pô mblang