VOV4.Êđê- Tlam mbruê 24/1, Khua knŭk kna Phạm Minh Chính leh anăn êpul ngă bruă nao myơr brui mngưi, mnga ti sang bi hdơr kơ khua gĭt gai Hồ Chí Minh, myơr mnga, brui mgưi ti anôk mdưm rup pô djŏng ktang Lê Lợi ti ƀuôn prŏng Thanh Hóa, nao čuă, mă bruă leh anăn hơêč hmưi tết kơ phung knuă druh, kahan ksiêm čar Thanh Hoá. Khua knŭk kna hlăk mblang: Thŭn 2022 ăt srăng mâo lu klei dleh dlan, dleh ksiêm dlăng, kyuanăn amâo dưi ngă ngơi mang, luč klei răng, srăng mprăp ai tiêm ai dưi, klei gĭt gai jăk hĭn mkă hŏng dŭm thŭn. Khua knŭk kna lač klă, bruă klam tal êlâo hĭn jing hur har nao hgŭm hlăm bruă gang mkhư̆ klei ruă tưp, hlăm anăn, kñăm kơ bruă tlŏ mgang vaccine, jing êpul êya kahan ksiêm mbĭt hŏng dŭm êpul mkăn srăng nao djăp kjhiêt, khŏk ƀăng grăp sang, ksiêm dlăng grăp čô čiăng tlŏ mgang vaccine kơ mnuih ƀuôn sang. Khua knŭk kna mtă kơ êpul kahan ksiêm čar Thanh Hoá srăng lŏ thâo klă boh sĭt, đru kčĕ hŏng bruă Đảng nah gŭ, bruă sang čư êa ƀuôn prŏng čiăng gĭt gai, ngă jăk jih bruă ksiêm dlăng, rơ̆ng klei êđăp ênang, hâo hưn, mkŏ mjing klei ngă bruă leh anăn bi lar bruă klam jing kmeh gơ̆ng, răng mgang klei êđăp ênang leh anăn klei hơĭt hlăm klei hdĭp kơ mnuih ƀuôn sang.

Pô mblang: Y-Ƀel Êban