VOV4.Êđê - Ăt hlăm aguah mbrue, Khua knŭk kna Phạm Minh Chính nao čuă lehanăn mđĭ ai phung nai lehanăn hđeh hriăm hră sang hră knŭk kna čiêm rông hđeh mnuih djuê ƀiă Huỳnh Cường, čar Sóc Trăng. Bi trông hŏng phung khua kiă kriê čar Sóc Trăng, lehanăn phung khua kiă kriê sang hră, Khua knŭk kna mâo klei bi mni kơ ai tiê hriăm mjuăt, lehanăn mtô bi hriăm mơ̆ng phung nai lehanăn phung hđeh sang hră anei, hlăm klei gĭr prŏng hgao klei dleh dlan, gĭr hlăm grăp hrue čiăng mâo mtô jăk, lehanăn hriăm jăk.

Lŏ bi hdơr klei Awa Hô lač “Kyua klei tŭ dưn 10 thŭn pla kyâo, kyua 100 thŭn mjut mjing anak mnuih”, Khua knŭk kna čang hmăng kơ phung nai mtô, lehanăn phung hđeh hriăm hră sang hră Huỳnh Cường mđĭ hĭn knhuah gru dhar kreh đưm, mâo klei đĭ kyar kluôm ênŭm, hŏng lu klei tŭ dưn jăk hlăm bruă mtô lehanăn hriăm. Khua knŭk kna čang hmăng lehanăn đăo knang, hŏng klei dŭm gưl kiă kriê, lehanăn amĭ ama mâo klei đăo knang kơ phung nai mtô, lehanăn klei êpa mhao mơ̆ng phung hđeh bi gĭr hĭn hlăm klei hriăm mjuăt, čiăng bi mlih klei hdĭp pô, đru bi rŭ mdơ̆ng lăn čar knư̆ hrue knư̆ mdrŏng sah jăk siam./.

Y-Khem pô mblang