VOV4.Êđê- Aguah mbruê 12/1, Khua knŭk kna Phạm Minh Chính nao leh anăn gĭt gai klei kƀĭn mklin bruă ngă thŭn 2021 leh anăn ba mdah bruă klam thŭn 2022 mơ̆ng dhar bruă kiă kriê bruă knuă, mơ̆ng phŭn bruă kiă kriê bruă knuă mkŏ hŏng 63 čar, ƀuôn prŏng. Blŭ hlăm klei kƀĭn, Khua knŭk kna Phạm Minh Chính yap yuôm bhăn leh anăn pah mni dŭm boh tŭ dưn mơ̆ng dhar bruă kiă kriê bruă knuă dưi mâo hlăm thŭn 2021, đru mguôp hlăm klei đĭ kyar ala čar.

Êngao kơ anăn, Khua knŭk kna ăt ktrâo klă dŭm klei dôk mâo leh anăn klei ka dưi ngă mơ̆ng dhar bruă kiă kriê bruă knuă msĕ si bruă mkŏ mjing klei ngă hlăm hdră êlan ka djăp ênŭm hnơ̆ng čoh čuăn, djŏ hŏng boh sĭt. Hlăm hruê kơ anăp, Khua knŭk kna mtă brei mlih mrâo leh anăn bi klă hdră ksiêm dlăng knuă druh, phung mă bruă knŭk kna, čiăng mâo klei hrăm mbĭt, kơ jih bruă kđi čar leh anăn hdră bi mguôp dŭm phŭn bruă, phung mă bruă knŭk kna gưl să leh anăn gưl kdriêk, gưl čar. Đru kčĕ čiăng dăp mnuih mă bruă, hŏng klei mbruă, djŏ guôp hŏng boh sĭt ară anei.

Pô mblang: Y-Ƀel Êban