Ti anôk bruă Klei bi kƀĭn ala čar, Hà Nội, Khua knŭk kna Phạm Minh Chính gĭt gai klei bi kƀĭn kluôm gưl dlông grăp thŭn kơ bruă tuh tia mrâo mrang 4.0 thŭn 2023 mguôp hŏng klei pŏk ngă hdră mtrŭn mrô 29 kơ bruă tuh tia mkra mjing, bi mrâo mrang hŏng akŏ “mđĭ mlih mrâo mrô, bi mlih mtah mjing klei êdah kdlưn bi pral hdră tuh tia mrâo mrang lăn čar truh thŭn 2030, hnơ̆ng trah dlăng truh thŭn 2045”.

Blŭ hrăm hlăm klei bi kƀĭn, Khua knŭk kna Phạm Minh Chính lač klă, bruă mdrơ̆ng leh anăn mđĭ kyar mơ̆ng grăp ala čar hlăm ênuk mrô leh anăn bi mrâo mrang ară anei jing bruă prŏng, mjêč, sui. Hŏng Việt Nam, thâo săng klă kơ klei găl leh anăn klei mtă, Knŭk kna pral mdrơ̆ng, mlih mrâo čiăng đĭ kyar. Êlâo hĭn, amâo mdei gĭr čiăng lŏ dơ̆ng mkŏ mjing sa knŭk kna djăp klei găl kriê dlăng mđĭ kyar hlăm ênuk mrô. Mbĭt anăn, dŭm gưl, dŭm dhar bruă leh anăn kluôm ala ƀuôn mâo leh klei bi mlih mơ̆ng klei thâo săng truh kơ bruă ngă čiăng ba yua klei găl leh anăn mdrơ̆ng hŏng klei lông dlăng mơ̆ng ênuk mrô.