VOV4-Êđê- Aguah mbruê, ti Hà Nội, knơ̆ng gĭt gai lĭng kahan gưl dlông, phŭn bruă lĭng kahan mkŏ mjing klei kƀĭn trông bruă kđi čar hlăm kluôm lĭng kahan 6 mlan akŏ thŭn. Khua knŭk kna Phạm Minh Chính, khua hlăm knơ̆ng gĭt gai lĭng kahan gưl dlông nao hgŭm leh anăn gĭt gai klei kƀĭn. 6 mlan akŏ thŭn 2022, knơ̆ng gĭt gai lĭng kahan gưl dlông, phŭn bruă lĭng kahan gĭt gai, ktrâo lač kluôm lĭng kahan bi mguôp, sa ai, gĭr ktưn, bi leh kluôm ênŭm bruă klam, lu bruă klam bi leh jăk, mâo bruă klam bi leh kdlưn hĭn.

Bi kơ bruă klam kñăm hlăm mlan 6 knhal jih thŭn, kluôm lĭng kahan čŏng pô, thâo klă boh sĭt, đăo knăl hnưm, hmao đru kčĕ hŏng Đảng, knŭk kna čiăng mâo hdră mgaih msir djăp klei mâo, hluê ngă dŭm hdră êlan, hdră mkăp, klei bhiăn ala čar hlăm bruă lĭng kahan, hluê ngă jăk dŭm hdră êlan bi mguôp bruă lĭng kahan hŏng bruă duh mkra ala ƀuôn, hluê ngă kjăp bruă lĭng kahan ti dŭm phŭn bruă, dhar bruă, alŭ wăl leh anăn mtô mjuăt bruă lĭng kahan, rơ̆ng mprăp klei bi blah, ksiêm dlăng kjăp wăl adiê, krĭng ksĭ, knông lăn, răng mgang klei dưi kiă kriê ala čar leh anăn dŭm mta bruă mđĭ kyar bruă duh mkra êa ksĭ.

Pô mblang: Y-Ƀel Êban